Bawat araw na lumipas,
katangi-tangi ang isa. Hindi ang aking kaarawan o ang sa iba; kundi ang
kaarawan ni Hesus Kristong walang iba. Kilala mo ba siya? Alam mo ba ang
tungkol sa kapanganakan niya?
Kaiba itong sa kanya. Lahat
ng magkaaway nagkakabati at mga mahal sa buhay na nawalay ay nagsisidatingan. Ang
lahat ng kabahayan ay naghahanda ng nakakatakam na pagkain. Ang mga bata’y
nangangaroling, nagkakantahan, at binabagtas ang kalsadang naiilawan ng mga
makukulay at tila ba nagsasayaw na parol. Muling maririnig ang kampana ng
simbahan sa medaling araw at kabilaan ang bigayan ng regalo. Ito ang mga
pangyayaring minsan lang sa buong taon kung ganapin. Lagi kong inaabangan at ng
lahat ng kabataan. Ito ang kapanganakan ng ating tagapagligtas na si Hesus –
ito ang tinatawag na Pasko.
Taon-taon
nating ipinagdiriwang ito ngunit ang nakaraang Pasko ang pinakaespesyal. Ang higit
sa isang taon kong hindi nakasamang paboritong pamangkin galing sa abroad ay
umuwi dito sa Pilipinas para magbakasyon kasama ang kanyang mga magulang. Hindi
man kami kumpletong pamilya Tacazon ay parang buo pa rin kami. Ganoon na rin
ang pakiramdam dahil ramdam naming ang sayang walang katulad at walang halong
pagkukulang kasi nangamusta naman ang mga kamag-anak naming nasa malayo.
Dahil
nga Pasko, naghanda kami ng caldereta para sa hapunan na aming ibinahagi sa mga
kapitbahay na kamag-anak rin namin. At nang Noche Buena naman ay sa
hapag-kainan mayroong spaghetti, macaroni, pansit, barbeque at softdrinks na
aming pinagsaluhan. Malamig ang simoy ng hangin at sumasaliw ang kabilaang
pinapatugtog ng mga kabaranggay na awit pamasko; idagdag pa ang mga
nagsisiuwian galing simbahan para sa misa ng Pasko. Ngunit isa sa mga hindi
naming nakasanayang gawin na karaniwang ginagawa ng ibang pamilya ang bigayan
ng regalo. Sapat na kasi sa amin ang pagtutulungan kung may kailangan at
sama-samang ipagdiwang ang mga okasyong espesyal sa aming tahanan.
Lahat
ng ito nangyayari lamang tuwing ika-25 ng Disyembre. Kilala mo naman siguro ang
tagapagligtas nating lahat sa ating mga kasalanan. Si Hesus na nag-iisang anak
ng Diyos. Pasko ang araw ng kapanganakan Niya na ipinagdiriwang saan mang panig
ng mundo. Walang dudang katangi-tangi ang mga karanasan sa tuwing sasapit ang
araw Niya. Sa mga nakuwento ko, ito ang paglalarawan ko ng Pasko. Ito ang mga
karanasan ko noong nakaraang Pasko. Ikaw, maaari mo bang ibahagi ang sa inyo?
